Алтынньы 7 күнүгэр культура дыбарыаһыгар "Мин сааһым - мин аргыстарым" аҕам саастаахтар күннэригэр аналлаах тэрээһин олус үчүгэйдик ааста. Күһүҥҥү хаардаах силбик күнү аахсыбакка элбэх киһи күргүөмүнэн анньан кэлбиттэрэ тэрээһин таһымын үрдэттэ. Тулунаттан, Майаҕастан ыалдьыттар кэлэн кыттыыны ылан бардылар. Мүрү нэһилиэгин дьаһалтатын баһылыгын эбээһинэһин толорооччу П. Ф. Румянцев эҕэрдэлээн тыл эттэ, наҕараадалары туттарда. "Мүрү нэһилиэгин бочуоттаах олохтооҕо" үрдүк аат иҥэрилиннэ А. А. Ксенофонтовка, "Мүрү нэһилиэгин социальнай-экономическай сайдыытыгар киллэрбит кылаатын иһин" анал бэлиэнэн Николай Местников, Анна Ксенофонтова, Бочуотунай Грамотанан Н.В. Москвитин, Ю. А. Бурнашев наҕараадаланнылар. Музыкальнай эҕэрдэлэрин Доминик Васильев, Валентина Варламова, Сайыына Стручкова, Лена Винокурова, Александр Гоголев тиэртилэр. "Күһүҥҥү уобарас" уонна ретро мода күрэҕэр олус бэркэ таҥнан-симэнэн кэлбит Ирина Стрекаловская бастаата. Король уонна Королева ааттарын Юрий Кривогорницын, Анастасия Мигалкина сүктүлэр. Бириистээх оонньуулар, конкурстар, үҥкүү-битии үгүс киһини хаптылар. Дыбарыас үлэһиттэрэ урукку кэм малын-салын, таҥаһын-сабын булан-талан фотозона оҥорбуттара тэрээһин кыттыылаахтарын сэҥээриитин ылла. Тэрээһин кэнниттэн Мүрү нэһилиэгин дьаһалтатын үлэһиттэрэ аҕам саастаахтары массыынанан дьиэлэригэр тастылар. В. В. Никифоров - Күлүмнүүр аатынан культура дыбарыаһын коллективыгар, Мүрү нэһилиэгин дьаһалтатыгар бэтэрээннэр ааттарыттан барҕа махталбытын тиэрдэбит.

Мүрү нэһилиэгин бэтэрээннэрин сэбиэтин салайааччыта М. М. Петухова. Алтынньы 7 күнэ, 2023 сыл