мматааҕы Ф. Потапов аатынан норуот айымньытын дьиэтигэр бэтэрээннэр ортолоругар улуустааҕы саахымат чемпионата буолан ааста. Чемпионакка ыаллыы сытар Мэҥэ Хаҥалас хамаандата кэлэн кыттыыны ылан турниры киэргэттэ. Бары кыттыбыт дьон чемпионаттан астынан-дуоһуйан тарҕастылар.

Амма бэтэрээннэрин ортотугар ыытыллыбыт саахымат чемпионата өрөспүүбүлүкэтээҕи «Бэтэрээн» сэрии уонна үлэ бэтэрээннэрин бырааптарын көмүскүүргэ көмөлөһөр Ассоциацияны кытта сөбүлэһии чэрчитинэн ыытылынна.

«Чемпионаппытыгар ыаллыы сытар Мэҥэ Хаҥалас улууһун саахыматчыттара кэлэн кыттыыны ылан, бэрт сэргэх оонньуу буолла. Кинилэри саахыматтарын Федерациятын бэрэссэдээтэлэ Павел Ионович Цыпандин салайан илдьэ кэлэ сырытта. Күрэхтэһиибит Амма улууһун өрөгөй ырыатынан саҕаламмыта олус долгутуулаах буолла уонна инникитин да бу маннык саҕалыахпыт диэн эрэнэбит. Бары кыттааччылар күрэхтэһииттэн астынан бардылар. Бука бары, бэл миэстэлэспэтэх да дьон бэлэх туттулар. Онон тэрээһиммит спонсорыгар «Бэтэрээн» Ассоциацияҕа истиҥ махталбытын тириэрдэбит», — диэн улуус саахыматын Федерациятын бэрэссэдээтэлэ Дмитрий Кузнецов сырдатар.

Чемпионат түмүгүнэн кыайыылаахтар билиннилэр. Ол курдук эр дьоҥҥо бастакы миэстэ Павел Цыпандин ( Мэҥэ Хаҥалас), иккис миэстэ Павел Яковлев (Амма), 3 миэстэ Петр Аммосов (Болугур), дьахталларга бастакы миэстэ Мария Григорьева (Амма), иккис миэстэ Сардаана Стручкова (Амма), үһүс миэстэ Розалия Павлова (Амма) буолан бэртээхэй бириистэринэн, мэтээллэринэн, дипломнарынан наҕараадаланнылар. Маны сэргэ чемпионат саамай аҕа саастаах оонньооччуларынан Мэҥэ Хаҥаластан Дмитрий Васильевич Сыромятников уонна Амматтан Тамара Алексеевна Иванова буолан анал бириистэринэн бэлиэтэннилэр.

«Амма олоҕо» хаһыат